Spennandi samstarf um þróun gervigreindarkennara

Félag lesblindra á Íslandi hefur gengið til samstarfs við Atlas Primer um að útbúa raddstýrðan gervigreindarkennara fyrir íslenskt námsefni. Með samstarfinu er stigið stórt skref í að auka aðgengi lesblindra að námsefni, og færa menntakerfið inn í framtíðina.
 
Atlas Primer er íslenskt sprotafyrirtæki í menntatækni sem hefur einsett sér að auka aðgengi að námsefni fyrir alla nemendur, með því að nýta talþjóna og snjalltæki. Með lausn Atlas Primer er hægt að veita hvaða námsefni sem er með talþjóni og geta nemendur því nálgast fyrirlestra, verkefnalýsingar, prófspurningar, svör og skilgreiningar, með raddskipunum einum saman og mun talþjónninn spila efnið, lesa það upp eða svara í töluðu máli.
 
Ljóst er að núverandi menntakerfi byggir í of miklu mæli á lesnum texta og kyrrsetu fyrir framan skjái en í slíkum aðstæðum þarf að búa til sérstök úrræði fyrir lesblinda og aðra sem eiga erfitt með að sækja sér upplýsingar með þeim boðleiðum. Hinrik Jósafat Atlason, stofnandi Atlas Primer, segir að þeirra markmið sé að búa til námsumhverfi sem sé einstaklingsmiðaðra og henti mismunandi nemendum betur, lesblindum eður ei, og auka þannig aðgengi að námsefni fyrir alla, án sérkennslu og sérúrræða.
 
Atlas Primer er nú þegar notaður við kennslu í Háskólanum í Reykjavík og er í prófunum víðar. Reynslan af honum hefur verið góð og ljóst er að raddstýringin sé mikill þægindaauki fyrir alla nemendur, þó kostirnir séu vafalaust töluvert meiri fyrir lesblinda.
 
Samstarf Félags Lesblindra á Íslandi og Atlas Primer gengur út á að gera talþjónin aðgengilegan á íslensku en hann er í dag aðeins fáanlegur á ensku. Vonast er til að vel gangi að tryggja fjármagn til að standa undir nauðsynlegum þróunarkostnaði og að verkefnið vinnist þá eins hratt og mögulegt er en rétt er að taka fram að kennarar og leiðbeinendur námskeiða á ensku, geta strax í dag byrjað að nýta sér raddstýrða gervigreindarkennarann.
 
Áhugasömum er bent á að hafa samband við snaevar@fli.is sem veitir nánari upplýsingar en nánar má fræðast um Atlas Primer á síðunni þeirra https://www.atlasprimer.com