Góð ráð fyrir lesblinda starfsmenn

Það getur verið afar gott að setjast niður með yfirmanni og fara yfir hvaða áhrif lesblindan hefur og hvað sé hægt að bæta í vinnuumhverfinu svo að þú getir nýtt alla hæfileika þína. Í því samhengi er gott að byrja á að skoða eigin styrkleika og veikleika. Þú getur t.d. spurt þig að eftirfarandi:
– Hvaða áhrif hefur lesblindan á mig í vinnunni?
– Hvaða verkefni eru það sem lesblindan hefur mest áhrif á?
– Er það að skrifa tölvupóst?
– Taka niður skilaboð í símtali?
– Lesa leiðbeiningar?
– Skipuleggja daginn?

 

Lestur og skrif

Það er hægt að bæta getu til að vinna með texta með því að tileinka sér nokkur grunnatriði. Hér fyrir neðan er farið yfir nokkur þeirra.

  • Ef þú þarft að skrifa langan texta, skiptu þá efninu í hluta því þannig vinnst verkið betur.
  • Veldu tíma þegar þú veist að þú verður ekki fyrir truflun.
  • Skráðu hjá þér orð sem þú veist að þú átt erfitt með að stafsetja þannig að þú getir flett þeim upp síðar meir.
  • Notaðu stuttar setningar, einbeittu þér að aðalatriðunum.
  • Lestu textann og greindu aðalatriðin.
  • Hafðu ekki áhyggjur af stafsetningu fyrr en þú hefur lokið við að skrifa.
  • Breyttu leturgerð, stærð eða bakgrunnslit.
  • Renndu yfir textann og skoðaðu myndir og töflur vel.
  • Prentaðu á litaðan pappír eða litaðar glærur.
  • Nýttu þér leiðréttingarhugbúnað.
  • Nýttu vafra sem lesa yfir á íslensku.
  • Búðu til sniðmát fyrir tölvupósta, reikninga, fundarbókanir, pantanir o.fl.
  • Láttu talgervil alltaf lesa textann jafnóðum sem og í lokin svo þú heyrir hvernig hann hljómar.

Minni

Minnisörðugleikar eru vandamál sem lesblindir þekkja vel og tengjast oft nöfnum, dagsetningum og staðreyndum. Kvíði og streita geta aukið á vandann. Margir lesblindir hafa gott sjónminni og muna því betur ef upplýsingar eru myndrænar á meðan aðrir muna betur það sem er sagt er. Því er mikilvægt að þú áttir þig á hvort henti þér betur að sjá eða hlusta.

Hafðu eftirfarandi í huga þegar kemur að skráningu upplýsinga.

  • Afar gott er að nýta tengiliði og dagbækur í tölvu eða farsíma til að muna nöfn, tímasetningar og fleira.
  • Notaðu upptökutæki eða síma til að taka upp námskeið eða mikilvæga fundi.
  • Nýttu myndavélina þína til þess að taka myndir af mikilvægu efni á fundatöflunni.

Skipulagning og tímastjórnun

Að skipuleggja daginn mun spara þér tíma. Að takast á við lesblindu á vinnustaðnum hefur oft í för með sér að þú þarft að eyða meiri tíma í suma hluti en aðrir. Því er mikilvægt að verða góður í að forgangsraða verkefnum.

  • Búðu til lista. Skrifaðu niður það sem þarf að gerast í dag. Farðu yfir það mikilvægasta og merktu það sérstaklega.
  •  Farðu yfir listann tvisvar á dag. Ef þú lítur ekki á listann reglulega er hann ekki til gagns.
  • Endaðu daginn á að færa það sem ekki kláraðist á lista morgundagsins.
  • Notaðu dagbók fyrir alla fundi, nýttu hana líka til að setja inn skilafresti verkefna.
  • Nýttu dagbókina fyrir alla mikilvæga atburði í lífi þínu eins og afmælisdaga
  •  Sumum finnst gott að nota minnismiða sem hengja má framan á tölvuna eða á vegg við hlið hennar með atriðum sem muna þarf.
  •  Reyndu að raða skjölunum þínum þannig að þú eigir auðvelt með að finna þau. Hægt er flokka gögn í nokkra bakka: það sem á að gerast í dag, þarf að gerast bráðum eða geyma.

Endilega hafðu samband við okkur hjá félaginu ef þú hefur spurningar eða vilt leita ráða.